බෝට්ටු සවාරිය හා භෝජන සංග්‍රහය (Dhow Cruise Dinner)

ඩුබායි යනු සංචාරක පාරාදීසයක් බව ඔබ සියලු දෙනා දන්නා කරුණක්. මිට ප්‍රථම මා විසින් එහි බොහෝ තැන් ගැන බොහෝ ලිපි පළකර ඇත. ඔබට අවැසි නම්, ඒ ලිපි මාගේ බ්ලොගය තුලින්ද කියවා බැලිය හැක. ( nomadstravelnotes.blogspot.com )  Dubai Creek යන්න කවරක්ද යන්න ගැනත් මේ බ්ලොග් එක තුලින් කියවා බැලිය හැක.)  වසරකට මිලියන ගණනක් සංචාරකයින් පැමිණෙන ඩුබායිහි, තවත් රසවත් තැනක් ගැන මේ ලිපියෙන් තොරතුරු ඉදිරිපත් කරන්නම්.

ඩුබායිහි සංචාරය කරන අය අතර මූලික වශයෙන් ප්‍රචලිත ක්‍රියාකාරකම් තුනක් පවතිනවා. ඒවා 3D යනුවෙන් හැඳින්වෙනවා. ඉන් එකක් වන්නේ Dhow cruise dinner යන්නයි. Dhow යනු දැවයෙන් නිමකළ, විශාල ප්‍රමාණයේ බෝට්ටුවකි. ඇන්ජිමක් මගින් ධාවනය වන මෙහි බොහෝ පිරිසකට ගමන් කල හැකියි. විශේෂත්වය වන්නේ, මෙය තට්ටු දෙකකට නිර්මාණය කර තිබීමයි. එහි පහත කොටස වීදුරු කවුළු යොදා, වායුසමනය කොට ඇති අතර, ඉහල කොටස සමහරෙක විවෘතවත්, සමහරෙක වහලයකින් ආවරණය සහිතවත් සකස් කොට ඇත. එසේම ඉහල මහල වායුසමනය කල හා නොකළ වශයෙන්ද වර්ග කල හැක. කෙසේ වුවද ඉහල මහලක ගමන් කරන අයට, පහත මහලට වඩා හොඳින් Creek එක සහ ඒ අවට නැරඹීමේ හැකියාව පවතින බව අමුතුවෙන් කිව යුතු නොවේ. 

මේ යාත්‍රාවේ ගමන පැය දෙකකට පමණ සිමාවේ. එම කාල සීමාව තුල, හෙමින් හෙමින් creek එක දිගේ ඉහලට හා පහලට ගමන් කිරීම සිදු කෙරේ. රාත්‍රී 8 පමණ ආරම්බ කරන මේ ගමන, රාත්‍රී දහයට පමණ අවසාන වීම සාමාන්‍ය සිරිතයි. එහි ගමන් කිරීම සඳහා ටිකට් පතක් මිලදී ගත යුතු අතර, එයට රාත්‍රී ආහාරය, අප්‍රමාන වතුර හා බිම වර්ග (මධ්‍යසාර නොවේ) අඩංගුය. රාත්‍රී ආහාරය බුෆේ ක්‍රමයට පිළිගැන්වේ. මිට අමතරව මේ රටේ සංස්කෘතියට අනුව කුඩා සංස්කෘතික අංග ගණනාවක්ද ඇතුලත්ය. Magic show, dancing events වැනි විවිධ ක්‍රියාකාරකම් කිහිපයක් ඊට ඇතුලත් වන අතර, මිලදී ගන්නා ටිකට්පතේ වටිනාකම අනුව සුඛෝපභෝගිබවේ තත්වය වෙනස් වනු ඇත. මෙවැනි යාත්‍රා බොහෝ ගනනක් Dubai Creek හි සේවය සපයන අතර, Dubai Marina ප්‍රදේශයේද මේ වනවිට මේ හා සමාන සේවාවක් ක්‍රියාත්මක වේ. සාමාන්‍ය මට්ටමේ සිට අධි සුඛෝපභෝගී යාත්‍රා දක්වා මේ සේවය පැතිර පවතී. සමහර යාත්‍රා 5* මට්ටමේ රසවත් ආහාර පාන වලින් මෙන්ම, සේවාවයෙන්ද යුක්තය.

රසවත් සංගීතයට සවන් දෙමින් (බොහෝ විට හින්දි, ඉංග්‍රීසි සහ අරාබි) පැය දෙකක් පුරා මුහුදු සුළඟ විඳිමින් ගමන් කිරීම ඉතාම චමත්කාර ජනකය. විශේෂයෙන් නොනිදන නගරයක් වන Dubai හි, පැරණි ජනාවාස ප්‍රදේශය වන Deira හා වර්තමාන වෙළඳ නගරය වන Bur Dubai යන දෙපසම මෙහි දෙපසින් රාත්‍රිකාලයේ පවා දැඩි ආලෝකයෙන් යුතුව දැකිය හැකි නිසා, දැඩි චිත්තාකර්ශනීය බවක් ඇති බව පැවසීම අතිශයෝක්තියක් නොවේ. ලොව සංචාරක පුරවරයක් වන Dubai වෙත ඔබ වරක් හෝ පිය නගන්නේ නම්, මෙහි රසවත් ආහාර රසවිඳිමින් යාත්‍රා කිරීමට අමතක කරන්න එපා යයි මෙයින් සිහිපත් කරමි.

(මෙවැනි එක අවස්තාවක ගනු ලැබූ කුඩා වීඩියෝවක් මේ සමග ඇත. ඔබට එය රසවිඳීමට පුළුවන)

ඩුබායි ෆ්‍රේම් (Dubai Frame)

Dubai Frame (ඩුබායි ෆ්‍රේම්)

ඩුබායිහි විවිධ ස්ථාන ගැන ඉදිරිපත් කරන ලිපිපෙළ යටතේ, අද දිනයේ මා විසින් සටහන් තබීමට උත්සාහගන්නේ, මෑතකදී විවෘත කරන ලද ඩුබායි ෆ්‍රේම් (Dubai Frame) නමින් හඳුන්වන විශේෂිත වූ ගොඩනැගිල්ල පිළිබඳවයි. 2009 වර්ෂයේදී ලොව පුරා සිටි ගෘහ නිර්මාණ ශිල්පින් හා ආයතන 926 වෙතින් ඉදිරිපත් වූ සැලසුම් අතරෙන්, මෙම සුවිශේෂ වූ ගොඩනැගිල්ල ඉදිකිරීම සඳහා වූ සැලසුම් යෝජනාව පිළිගෙන තිබෙනවා. මෙම සැලසුම් ඉදිරිපත් කල පිරිස අතර, ලොව පුරා කීර්තිමත්ම සැලසුම් ශිල්පින් රාශියක් සිටීම විශේෂත්වයක්. සිය ගණනක් වූ මේ නිර්මාණ ශිල්පීන් විසින් ඉදිරිපත් කල සැලසුම් යෝජනා වල තරඟයකින් පසු, ප්‍රථම ස්ථානය දිනා ගත් Fernando Donis නමැති ශිල්පියාගේ මෙම සැලසුම, අවසානයේදී ක්‍රියාවට නගා තිබෙනවා. මෙම සැලසුම වෙනුවෙන් ඔහුට හිමිවූ ත්‍යාග මුදල ඇමරිකානු ඩොලර් ලක්ෂයක් හෙවත් ඩිරාම් තුන්ලක්ෂ හැටහත් දහස් දෙසීය පනස් එකක් වනවා.

ඩුබායි ෆ්‍රේම් යනු එකිනෙකට සමාන්තරව ඉදි කෙරුණු, මීටර් 150 උසකින් යුතු කුළුණු දෙකකින් සමන්විතය ගොඩනැගිල්ලක්. මීටර් 105 පළලකින් යුතුව ඉදිකර ඇති මෙම කුළුණු දෙකෙහි ඉහල කොටස් දෙක තවත් ඒ හා සමාන තිරස් කුළුණකින් සම්බන්ධ වී තිබෙනවා. ඒ අනුව බලන විට මෙය චායාරූප රාමුවකට (Picture Frame) සමාන පෙනුමක් ගෙනදෙනවා. මෙහි ඉහල තිරස් කුලුන නැරඹුම් මැදිරියක් (observation deck) වශයෙන් වීදුරු වලින් සකස් කොට ඇති අතර, එහි සිට බලන පුද්ගලයෙකුට මුළු ඩුබායි එමිරේටයම ඉතා චමත්කාරව දැක ගැනීමේ හැකියාව පවතිනවා. මෙම සමස්ත ගොඩනැගිල්ලම සකසා තිබෙන්නේ වීදුරු, යකඩ, ඇලුමිනියම් සහ කොන්ක්‍රීට් වලිනුයි. මෙම ගොඩනැගිල්ල ඉදිකිරිම සඳහා වූ වියදම එක්සත් අරාබි ඩිරාම් ලක්ෂ 1200 හෙවත් ආසන්න වශයෙන් රුපියල් ලක්ෂ 50,400 පමණ වනවා.

මෙම සුවිශේෂ ගොඩනැගිල්ල ඉදිකර තිබෙන්නේ, ඩුබායිහි කරාමා නමැති නගරයේ පිහිටි සබිල් පාර්ක්‌ (Zabeel Park) නමැති සුවිශාල උද්‍යානය තුලයි. එම ස්ථානයේ මෙම ගොඩනැගිල්ල ඉදිකිරීමටද විශේෂ හේතුවක් පවතිනවා. ඒ මේ ගොඩනැගිල්ල දෙපස පැරණි නැතහොත් මුල් කාලයේ ජනාකිර්නව පැවති ඩුබායිහි නාගරික ප්‍රදේශය හා, වර්තමානයේ සුවිශාල දියුණුවකට ලක්වී ඇති ඩුබායිහි නවීන නගර පිහිටි ප්‍රදේශය, මෙම ගොඩනැගිල්ල දෙපස පිහිටා තිබීමයි. ඒ අනුව මෙම ගොඩනැගිල්ලෙහි ඉහල නැරඹුම් මහලෙහි සිට බලන අයෙකුට, මේ ප්‍රදේශ දෙකම එකවර නැරඹීමේ පහසුකම් හිමිවනවා. දෙපස පිහිටි සමාන්තර කුළුණු දෙකෙහි වූ අධිවේගී විදුලි සෝපාන හරහා මෙහි තිරස් කුලුන වෙත පහසුවෙන් ලඟා විය හැකි අතර, එම තිරස් කුලුනෙහි නැරඹුම් මැදිරියට අමතරව ආපන ශාලාවක් (Terrace Cafe) පිහිටුවා ඇති අතර, භූගත වාහන අංගනයකින්ද, පුස්තකාලයකින් හා තොරතුරු මධ්‍යස්ථානයකින් මෙම ගොඩනැගිල්ල සමන්විත වනවා. 

අද වනවිට මෙය සංචාරක ආකර්ෂණය දිනාගත්, බෙහෙවින් කාර්යබහුල ස්ථානයක් බවට පත් වී තිබෙනවා. දිනෙන් දින දියුණු වන, එකිනෙකට වෙනස් ලොව නවීනතම ඉදිකිරීම් එළිදක්වන ඩුබායිහි, මෙය තවත් එක් ඉදිකිරීමක් පමණයි.