ලොව උසම ගොඩනැගිල්ලේ, වසර අවසාන මල්වෙඩි සංදර්ශනය

2017 වසර ගෙවී යන්න තව ඇත්තේ සුළු කාලයක්. 2018 නවමු වසර පිළිගන්න බොහෝ දෙනා ඇඟිලි ගනිමින් සිටිනවා. වසරක් අවසන් වී තවත් වසරක් උදාවනු දකින අප බෙහෙවින් පින්වන්තයින්. මන්ද අප ඒ වසර තුල ජීවත්වී, ඊලඟ වසරටත් පා නැගීමේ හැකියාව ලැබූ අය වීම නිසයි. ගෙවී යන වසරේ අවසන් දිනයේ බොහෝ දෙනා විවිධ අයුරින් සතුටු වනු දැකිය හැකියි. ජිවත්වන රටින් හෝ ප්‍රදේශයෙන් පිටවී වෙනත් ප්‍රදේශයක හෝ රටක සංචාරය කිරීම, ක්‍රීඩා වල නිරතවීම, අලුත් වැඩකටයුතු ආරම්භ කිරීම වැනි විවිධ කටයුතු තුලින්, විනෝද වීමට බොහෝ දෙනා පුරුදුව සිටිනවා. මම අද මේ ලිපිය මගින් ඉදිරිපත් කරන්නට බලාපොරොත්තු වන්නේ, ඩුබායිහි පිහිටි ලොව උසම ගොඩනැගිල්ල වසර අවසාන දිනයේ, එනම් දෙසැම්බර් මස තිස් එක් වන දින මධ්‍යම රාත්‍රියේ මල්වෙඩි සංදර්ශන වලින් ආලෝකමත් වන ආකාරය පිළිබඳවයි. 

ලොව උසම ගොඩනැගිල්ල වන බර්ජ් ඛලීෆා ගොඩනැගිල්ල පිහිටා තිබෙන්නේ ඩුබායිහි බව ඔබ බොහෝ දෙනෙකුන් දන්නා බවට කිසිදු සැකයක් නැහැ. මෙම ගොඩනැගිල්ල විවෘත කල වසරේ සිට, සෑම වසරකම අවසානයේ ඉතාමත් අලංකාර මල්වෙඩි සංදර්ශනයක් මෙම ගොඩනැගිල්ලෙහි පැවැත්වීම සිදු කොට තිබෙනවා. හරියටම නව වසර උදාවත් සමග ආරම්භ වන මේ ඉතා අලංකාර මල්වෙඩි සංදර්ශනය නැරඹීමට ඩුබායි පමණක් නොව, එකසත් අරාබි එමීර් රාජ්‍යයේ අනෙකුත් එමීර් හයෙහිම ජනතාව ප්‍රිය කරන බව සඳහන් කල යුතුව තිබෙනවා. ඊට අමතරව, මැද පෙරදිග අනෙකුත් රටවලින් මෙන්ම, ලොව පුරා විවිධ ධන කුවේරයන්ද මේ අවස්තාව දැක ගැනීම සඳහා ඩුබායි වෙත පැමිණෙන බව රහසක් නොවේ. මීටර් අටසියයකට වඩා උස, එනම් කිලෝමීටරයකට ආසන්න උසකින් යුතු ගොඩනැගිල්ලක මහලෙන් මහලට විවිධ රටා මවමින් මල්වෙඩි පුපුරා යන අයුරු ඉතා දර්ශනීය බව අමුතුවෙන් කිව යුතු නොවේ.

රට තුල වෙසෙන විවිධ රටවල, විවිධ ජාතිකයින්ට අයත් පිරිස් මේ අවස්තාව දැක ගැනීම සඳහා දෙසැම්බර් තිස් එක් වන දින කල්වේලා ඇතිව සුදානම් වනවා. ඉන් සමහර දෙනෙක් කල් ඇතිවම මේ දර්ශනය හොඳින් දිස්වන ප්‍රදේශ වල නතරව සිටින අතර, තවත් පිරිසක් එය හොඳින්ම දර්ශනය වන ප්‍රදේශ කරා එක්රොක් වනවා. කෙසේ වුවත් හවස හය පමනවනවිට මේ ගොඩනැගිල්ල පිහිටි ප්‍රදේශය වාහනයකින් තබා, පයින්වත් යා නොහැකි ලෙස ජනතාවගෙන් පිරි ඉතිරි යනවා. ඒ සැවොම මේ සුන්දර දර්ශනය දැකීමට දක්වන ප්‍රියතාවය නිසයි. 

හරියටම මධ්‍යම රාත්‍රී දොළහට ඇරඹෙන මල් වෙඩි සංදර්ශනය විනාඩි පහත් දහයත් අතර කාලයක් පවතිනවා. සෑම වසරකම පෙර වසරට වඩා නැවුම් හා සිත්ගන්නා අයුරින් මේ සංදර්ශනය පැවැත්වීම කැපී පෙනෙන්නක්. තවත් සඳහන් කල යුතු කරුණක් තිබෙනවා. ඒ තමයි, මේ දිනයට අමතරව අනෙකුත් දිනවලද ලොව සුවිශේෂී අවස්තාවන් සැමරීම සඳහා මේ ගොඩනැගිල්ල විවිධ ආලෝක වර්ණයන්ගෙන් සැරසීම. විවිධ රටවල ජාතික කොඩි, සංකේත හා අනෙකුත් සුවිශේෂී දේවල් ඉතා නිර්මාණාත්මකව හා කලාත්මකව විවිධ ආලෝක රටා මගින් මේ සුවිශාල ගොඩනැගිල්ල මත රටා මවන්නේ විශ්මිත ආකාරයටයි.

මේ සමග පසුගිය 2016 දෙසැම්බර් තිස් එක් වනදින මා විසින් රූ ගත කල එම මල්වෙඩි සංදර්ශනයේ වීඩියෝවක් අමුණා තිබෙනවා. කෙසේ වුවද පියවි නෙතින් දකින සුන්දරත්වය මේ තුලින් දැකිය නොහැකියි. එහෙත් ඔබගේ දැනගැනීම සඳහා පමණක් මා එය මේ සමග අමුණා තිබෙනවා. 

යලිත් ඩුබායිහි තොරතුරු රැගෙන මේ තුලින් හමු වෙන්නම්. ඔබට කැමතිනම් මෙහි ඇති Subscribe නමැති බොත්තම ඔබා ඔබගේ ඊමේල් ලිපිනය ඇතුලත් කිරීමෙන් මෙහි ලිපියක් පළවූ සැනින් දැනගැනීමේ හැකියාව පවතිනවා. එසේම මින් පෙර මා පලකල ලිපි කියවිමටද මේ පිටුව භාවිතා කල හැකියි.

ඔබ සැමට ජය හා සතුට පිරි, සියලු පැතුම් ඉටුවන සුභ නව වසරක් වේවා....! 

රට ඉඳි (Dates)

රට ඉඳි ගැන ඔබ බොහෝ දෙනෙකු අසා ඇතිවාට සැකයක් නැහැ. ඒ වගේම රට ඉඳි රස විඳ තිබෙන්නටත් පුළුවන්. රට ඉඳි ගස වැඩිපුරම දැකිය හැකි වන්නේ  මැද පෙරදිග කලාපයේ බව විශේෂයෙන් සඳහන් කල යුතුය. එහි පවතින ශුෂ්ක කාලගුණය, රට ඉඳි ගසේ වැඩීමට මනා පිටුවහලක් වී තිබේ. ක්‍රි. පූ. 5000 කට ආසන්න අතීතයේ පවා, රට ඉඳි වගාව මැදපෙරදිග කලාපයේ සිදුව තිබෙන බවට දැනට සාක්ෂි හමුවී ඇත. ඉපැරණි මෙසපොටේමියානු ශිෂ්ටාචාර යුගයේ පවා රට ඉඳි වගාව පැවැති බව පැවසෙනවා. පළතුරක් ලෙස මෙන්ම ආහාරයක් වශයෙන්ද රට ඉඳි භාවිතා කොට තිබෙනවා. කෙසේ වුවද අද වන විට මැද පෙරදිග කලාපයට අමතරව, අප්‍රිකානු හා තවත් බොහෝ රටවල රට ඉඳි වගාව සිදුකරනු ලබනවා. ශ්‍රී ලංකාවේද නැගෙනහිර පළාතේ සමහර ප්‍රදේශවල රට ඉඳි ගස් වගා කොට ඇති බව, පසුගිය කාලයේ අසන්නට ලැබුණි.

තාල වර්ගයේ ගසක් වන රට ඉඳි ශාකය, පිරිමි හා ගැහැණු ශාක ලෙස වර්ග දෙකකින් යුක්තයි. මෙයින් පල හටගනු ලබනුයේ ගැහැණු ශාක වල පමණි. වර්තමානයේ මහා පරිමාන වගා වලදී කෘතීම පරාගනය යොදා ගනු ලබන අතර, ඒ මගින් වැඩි අස්වැන්නක් ලබා ගැනීම අපේක්ෂාවයි. මෘදු, අර්ධ වියලි සහ වියලි වශයෙන් ක්‍රම තුනකින් යුතුව රට ඉඳි වෙළඳ පලේ දැකිය හැකි අතර, විවිධ වර්ගයේ, විවිධ ප්‍රමානවල, විවිධ රසයෙන් යුතු රට ඉඳි වර්ග බොහෝ ගණනක් දැකිය හැක. ලංකාවේ අප බොහෝ විට දකින කළු පැහැති රට ඉඳි වලට අමතරව, ලා කහ, රන්වන්, රතු, මෙරූන්, දුඹුරු වැනි වැනි විවිධ වර්ණවල රට ඉඳි දැක ගත හැකියි. අප බොහෝ විට ප්‍රියකරනුයේ මෙම ඉදී, පැණි බේරෙන රට ඉඳි වලට වුවද, යාන්තමට ඉදිගෙන එන අර්ධයක් කහ සහ අර්ධයක් රන්වන් පාට වූ රට ඉඳි අනුභවයට ගැනීමට අරාබි ජාතිකයින් බොහෝ ප්‍රිය කරනවා. එසේම සමහර රට ඉඳි වර්ග ඉතාමත්ම මිල අධික බවද මෙහිලා සඳහන් කල යුතු වෙනවා.

දෙවියන් විසින් දුන් ආහාරයක් ලෙස අරාබි ජාතිකයින් සලකන රට ඉඳි බොහෝ පෝෂණයෙන් යුතු ආහාරයක්ද වනවා. විශේෂයෙන් රාමසාන් උපවාස කාලයේ, උපවාසය අතහරින විට පළමුවෙන් ආහාරයට ගනු ලබනුයේද, රට ඉඳි වීම තුලින් මෙහි ඇති වටිනාකම වටහාගත හැකියි. බොහෝ විට වෙළඳ පළේදී රට ඉඳි පැණි, සිරප් මෙන්ම, කජු, මිදි, ආමන්ඩ් වැනිදේ සමග මිශ්‍ර කල රට ඉඳි රස බැලීමේ හැකියාවද පවතිනවා. ඔබටත් කෙදිනක හෝ මැදපෙරදිග රටකට පැමිණිය හැකිනම්, මේ රසවත් පලතුර රස විඳීමට අමතක කරන්නට එපා.

" අඹ, දඹ, නාරං, කෙසෙල්, දෙල්, පනා කකා මේ......."

මේ චායාරුපවලින් පෙනෙන ස්ථානයට කිහිප වතාවක් ගොස් තිබුනද, ඒ ගැන සටහනක් ලිවීමට සිතුනේ නැහැ. එහෙත් පසුගිය දිනෙක අහම්බෙන් මෙන් මගේ පැරණි චායාරුපයක් FB හි upload කලවිට ලැබුණු ප්‍රතිචාර නිසා ඒ ගැන යමක් ලිවයුතු යයි හැඟී ගියා. මෙහි දැක්වෙන්නේ ඩුබායිහි පිහිටි පලතුරු යුෂ හා ඒ ආශ්‍රිත නිෂ්පාදනය හා අලෙවිය සිදු කරන අවන්හලෙක දර්ශනයක්. ඩුබායිහි සිටින හෝ මෙහි සංචාරය කල කෙනෙකුට නම් මෙය අරුම පුදුම දෙයක් නොවන්නට ඉඩ තිබෙනවා. එහෙත් ලංකාවේ සිටින මාගේ හිතවතුනට මෙය වෙනස් අත්දැකීමක් වනවාට සැකයක් නැහැ. මෙහි පවතින කලාත්මක බව, බෙහෙවින්ම සිත් ඇද ගන්නක්.

මෙහි සඳහන් ජුස් ව්‍යාපාර ජාලයේ අලෙවි හල තුනක් දැනට ඩුබායිහි පිහිටුවා තිබෙනවා. බොහෝ ඉඩ පහසුකම් ඇති මෙම අවන්හල් වල ඇතුලත මෙන්ම, පිටත පදික වේදිකාව මතත්, අලංකාර මේස පුටු වලින් සමන්විතව පවතිනවා. ඒ පලතුරු යුෂ (fruit juice) පානය සඳහා පැමිණෙන අයට ඉතා සුව පහසුව, විවේකිව පලතුරු යුෂ පානය සඳහා ඉඩ සලසා දීමටයි. ඔවුනගේ මෙනු පතේ සඳහන් වී ඇති අන්දමට විවිධ වර්ගයේ පලතුරු යුෂ වර්ග 146 හා අතුරුපස වර්ග 3 සඳහන් වනවා. ලංකාවේ මුදලින් රු. 400/- සිට මේ මිල ගණන් ඇරඹෙනවා. කුඩා බෙරි ගෙඩියේ සිට අන්නාසි, කොමඩු වැනි විශාල පලතුරු දක්වා වූ පරාසයක මෙම පලතුරු යුෂ වර්ග පැතිර පවතිනවා. එසේම රු. 2000/- සිට රු. 40,000/- දක්වා වූ මිල ගණන් වලට පලතුරු වලින් සැකසු සැරසිලි හා පලතුරු පිඟන් මිලදී ගැනීමටද හැකියි. රු. 40,000/- ට පවතින්නේ විවාහ සංවත්සර (Wedding anniversary gift) ත්‍යාගයක් ලෙස දිය හැකි පලතුරු සැකසුමකි. එසේම චොකලට් හා අයිසිං වලින් සැරසු විවිධ පලතුරු වර්ගද මේ සමහර සැකසුම් වලට ඇතුලත්. පලතුරු යුෂ වර්ග අතර තනි පලතුරු වර්ග මෙන්ම, එකිනෙක මිශ්‍ර කොට සැකසු පලතුරු බිම වර්ග 146 පවතිනවා. ඒවායේ රසයද ඉතාම ඉහලයි.

කෙසේ වුවද මේ සියල්ලටම වඩා ආකර්ශනීයම දෙය වන්නේ, මෙහි ඇතුලත විවිධ රටා වලට අනුව පලතුරු එල්ලා ඇති ආකාරයයි. වැල් වශයෙන් මෙන්ම, තැනින් තැනද විවිධ රටාවනට අනුව, මේ පලතුරු ප්‍රදර්ශනය කොට ඇති අතර ඒ සියල්ලම ස්වභාවික පලතුරුයි. කිසිදු දෙයක් සෙල්ලම් බඩු හෝ ප්ලාස්ටික් නොවේ. එනිසාම, පලතුරු යුෂ විදුරුවක රස බලන්නට මෙහි එන බොහෝ දෙනෙකු ඒ අතර හිඳ චායාරුපයක් ගැනීමට අමතක නොකරන්නේ, එය අතිශය සුන්දර අත්දැකීමක් මෙන්ම දුලබ දර්ශනයක් වන නිසාමයි. කුඩා දරුවන් මෙන්ම වැඩිහිටියන්ද මෙම ස්ථානයේදී එකසේ විනෝද වන අයුරු දැක ගත හැකියි. 

ගහකොළ පිරුණු අපේ රටේදී නැවුම් පලතුරු යුෂ බිඳක් තොල ගෑම කොතරම් අසිරුදැයි ඔබ දන්නවා ඇති. සති ගණන් බක්කිවල වේලි, තැලී පරුවී යන කලට ජූස් බවට පත් වන පලතුරු හා, මේ අතර කෙතරම් විශාල වෙනසක් පවතිනවාදැයි ඔබටම සිතා ගත හැකියි. මේ සුන්දර ස්ථානයට යනවිට, ලංකාවේ ගහකොලවල ඉදී, වවුලන් කා බිම වැටි විනාශ වන පලතුරු ගැන සිතෙන්නේ, "අනේ අපොයි....!" කියාමය.

අමුඩ ගොවීන්ට "ඇප්"......!

ගොවියා යන වචනය ඇසෙන විටම අපගේ සිහියට නැගෙනුයේ, බුලත් කහට බැඳුනු දත් දෙපෙලෙන් යුතු, අමුඩයෙන් සැරසුණු, උදැල්ල උරය මත රඳවාගත් කළුවන් සිරුරෙන් යුතු අහිංසක මිනිසෙකි. අප කුඩා කාලයේත්, වර්තමානය වන විටත් ගොවියා යන පදය ඇසෙන විට, මිට වෙනස් චිත්ත රුපයක් මැවෙන්නේ නම් එය පුදුමයට කාරණයක්ද වනු ඇත. මේ තත්වය වෙනස් කිරීමටද අප රට පාලනය කල දේශපාලකයින්ට නොහැකි වී ඇති අතර, එසේ වෙනස් කිරීමට උත්සාහ කල හා කරන පාලකයින්ටද නොයෙක් පරිභව වලට ලක්වීමටද සිදුවී ඇත. එසේම කිසිදා බලයට පැමිණීමට නොහැකි සමහර පක්ෂ වලටද අවැසි වී ඇත්තේ ගොවියා යනු අමුඩයටත්, බුලත් විටටත් සිමා කොට තබාගනිමටය. මන්ද ගොවියා ඉන් මිදුනු දිනයට ඔවුනට සටන් පාඨ නැතිවී යන හෙයිනි.

මා මේ ලිවීමට යන තොරතුර, මා වෙසෙන රටට අදාළ නොමැති වුවද මේ සටහන තැබීමට සිතුවේ වෙනස් වන ලෝකය සමග වෙනස් වීමට අකමැති අපේ රටේ ජනතා ආකල්ප නිසා, අප රට කොතරම් දුරට පසුගාමී ඇතිද යන වග පෙන්වීමටය. මිට දින කිහිපයකට ඉහත අන්තර්ජාලය හරහා ලංකාවේ ප්‍රවුත්ති නරඹන විටක දුටුවේ, පසුගිය කාර්තුවේ ලොව අඩුම අන්තර්ජාල හෙවත් internet අගයක් පැවතියේ ඉන්දියාවේ බවයි. අධික ජනගහනයත්, විශාල පිරිසක් අන්තර්ජාලයට පිවිසීම නිසාත් මේ තත්වය ඇතිවී ඇති බව එහි සඳහන් විය. කෙසේ වුවද මිට දින කිහිපයකට පෙර මෙහි පුවත්පතක සටහන් වූ තොරතුරක් දැක පුදුමයට පත්වීමි. එතරම් අන්තර්ජාලය නොදියුණු ඉන්දියාවේ කෘෂිකර්මයට අදාළ මොබයිල් ඇප් එකක් සකසා ඇති බවත්, එය ප්‍රයෝජනයට ගෙන කාලගුණය, කෘෂිකර්මයේ නව තොරතුරු, බෙහෙත් වර්ග, වෙළඳපොල තොරතුරු ලබා ගන්නා ලෙස ඉන්දීය අගමැති නරේන්ද්‍ර මෝඩි මැතිතුමා ගොවි ජනතාවගෙන් ඉල්ලා සිටින බව එහි සඳහන් විය. අප රටේ ඇප් සකසනවා තබා, සිදුවන බොහෝ විෂමාචාර ක්‍රියා වලක්වා ගැනීම සඳහා සහ සහනාධාර ගොවීනට ලබා දීම සඳහා අන්තර්ජාලය හරහා ලියාපදිංචි වීමට දැන්වූ විට ඇතිවූ ප්‍රතිචාර පසුගිය කාලයේ අපට දැකිය හැකිවිය. එහෙත් අපටත් වඩා දුෂ්කර ඉන්දියාවේ, මිට වඩා බොහෝ දුර ගිය ගමනක් අරඹා ඇත.

ලොව බොහෝ රටවල ගොවියන් යනු මඩ තවරාගත්, උදලු කරේ රඳවාගත්, බුලත් විට සප්පායම් වන දිළිඳු නුගතුන් නොවන බව ලංකාවෙන් පිට, විවිධ රටවල වෙසෙන බොහෝ දෙනෙකු දන්නවා ඇත. එහෙත් ලංකාවේ ගොවියන් එවැනි දියුනුතැනකට එනවා දකින්නට ඔවුන් වෙනුවෙන් කිඹුල් කඳුළු හෙලන බොහෝ දෙනෙකු කැමති නැත. ඒ මා ඉහතින් දැක්වූ හේතුව නිසාවෙනි. කෙසේ වුවද රටක් හැටියට ඉදිරියට යාමට නම් අප කලයුත්තේ මේ වෙනස් වන ලෝකය හා තාක්ෂනය සමග අප රටට සුදුසු පරිදි අපද බද්ධ වීමය. එසේ නොවන තාක් බොහෝ අංශ වලින් පසුගාමී වීමට අපට සිදුවනු ඇත. රුපවාහිනිය හඳුන්වාදුන් අවදියේ "හූනියම් පෙට්ටිය" යනුවෙන් පැවසු මිනිසුන්ට එහි වටිනාකම වටහා ගැනීමට වසර ගණනාවක් ගතවිය. පරිඝනක හඳුන්වා දිමේදීද එය එසේම විය. ඒ අනුවම අන්තර්ජාලයද වර්ඝ කෙරිණි. කෙසේවුවද දේශපාලන කෝණයෙන් නොබලා හොඳ දෙයින් ප්‍රයෝජන ගැනීමට අප පුරුදු නොවන තාක් කල් මේ කටයුතු එලෙසම පවතිනු ඇත.